Саха Өрөспүүбүлүкэтин Мииринэй оройуонугар парашютунан чопчу биир сиргэ ыстанан түһүүгэ күрэх ыытылынна. Александр Меньшов, «Феникс» парашютнай кулууп бэрэссэдээтэлин солбуйааччы уонна «РНГ» АУо үлэһитэ турнир тэрийээччитин эрэ быһыытынан буолбакка парашютист-спорсменнарга 2-с бириистээх миэстэни ылары ситистэ.
Күрэхтэһии усулуобуйатын быһыытынан спортсменнар даҕаны, идэлээх авиационнай быыһааччылар даҕаны бары 1500 миэтирэ үрдүктэн ыстанан 8 миэтирэ уһуннаах бириһиэн кириэскэ түһүөхтээхтэр. Хас биирдии хамаанда 4-түү ыстаныыны оҥордо. Бастакы ыстаныы бэлэми көрдөрүү, онтон атыттар бааллара күрэххэ киирдэ. Александр Меньшов соругун ситиһиилээхтик толордо. Үрүҥ көмүс мэтээли аҕалбыт ыстаныы спорсмен карьератыгар 842-с буолла.
Александр Меньшов бу көрүҥүнэн 20 сыл устата дьарыктанар. 51 сааһыгар ЯК-52 сөмөлүөккэ көтөргө үөрэммитэ, онтон парашютнай спортка олоҕун анаабыта. 2014 сыллаахха биир санаалаахтарын кытта «Феникс» кулуубу тэрийбитэ, парашютнай спорт сайдыытыгар дьоһун кылаатын иһин Россия парашютнай спордун федерацията «За верность парашютному спорту» мэтээлинэн наҕараадалаабыта.
Александр этэринэн экстремальнай спорт көрүҥэ киһиэхэ элбэх кыаҕы арыйар. Парашюту таһынан кини өссө альпинизм, дайвинг көрүҥнэринэн дьарыктанар. Бу сайын Меньшов Памир икки чыпчаалын дабайарга бэлэмнэнэр. Экспедиция «РНГ» АУо өйөбүлүнэн барыаҕа, бу бырайыагы олоххо киллэриигэ хампаанньа харчынан көмөлөһүөҕэ.